وفاقی وزیرِ داخلہ محسن نقوی نے حال ہی میں بلوچستان کے علاقے مستونگ میں شہید ہونے والے میجر رضوان طاہر کے گھر جا کر ان کے اہل خانہ سے ملاقات کی۔ انہوں نے شہید کے والد کرنل (ر) محمد طاہر، والدہ اور بھائی میجر عثمان طاہر سے دلی ہمدردی کا اظہار کیا اور شہید کی قربانی کو خراجِ تحسین پیش کیا۔
محسن نقوی نے کہا کہ “آپ شہید بیٹے کے باہمت اور بلند حوصلہ والدین ہیں۔ آپ کا حوصلہ اور عزم ہی قوم کی اصل طاقت ہے، آپ کی عظمت کو سلام پیش کرتا ہوں۔”
“شہید کی قربانی رائیگاں نہیں جائے گی”
وزیرِ داخلہ نے مزید کہا کہ میجر رضوان طاہر نے بھارتی اسپانسرڈ دہشت گردوں کے خلاف بہادری سے لڑتے ہوئے جامِ شہادت نوش کیا۔ ان کی یہ عظیم قربانی رائیگاں نہیں جائے گی۔ اس موقع پر شہید کے والد نے بتایا کہ ان کے بیٹے نے کئی اہم خفیہ آپریشنز کی قیادت کی اور متعدد دہشت گردوں کو ان کے انجام تک پہنچایا۔
یاد رہے کہ میجر رضوان طاہر مستونگ میں ایک آئی ای ڈی دھماکے میں شہید ہوئے تھے جو بھارتی حمایت یافتہ دہشت گردوں نے نصب کیا تھا۔ اس ملاقات میں چیف کمشنر اسلام آباد محمد علی رندھاوا اور آئی جی اسلام آباد پولیس علی ناصر رضوی بھی موجود تھے۔
