قومی اسمبلی کی کمیٹی سے سول سرونٹس ترمیمی بل سمیت تین بلوں کی منظوری

قومی اسمبلی کی قائمہ کمیٹی کابینہ ڈویژن کا اجلاس ابرار احمد کی زیرصدارت ہوا، جس میں اہم قانون سازی پر غور کیا گیا۔

اجلاس کے دوران کمیٹی نے سول سرونٹس ترمیمی بل 2024 متفقہ طور پر منظور کر لیا۔

اس بل کی منظوری کے بعد 18ویں ترمیم کے نتیجے میں غیر فعال ہو جانے والے ادارے ختم کر دیے جائیں گے۔

بل کے تحت سرپلس ملازمین کو گولڈن شیک ہینڈ دیا جائے گا تاکہ انہیں بہتر پیکیج کے ساتھ ملازمت سے الگ کیا جا سکے۔

اجلاس میں نیشنل اسکول آف پبلک پالیسی ترمیمی بل 2025 بھی منظور کر لیا گیا۔

اس بل کے تحت آرڈیننس میں لفظ “وفاقی حکومت” کے بجائے “مجاز اتھارٹی” لکھا جائے گا، تاکہ دائرہ کار مزید واضح ہو سکے۔

کمیٹی نے کاروبار میں آسانی پیدا کرنے کے لیے آسان کاروبار بل 2025 کی بھی منظوری دے دی۔

سیکریٹری اسٹیبلشمنٹ نے کمیٹی کو بریفنگ دیتے ہوئے کہا کہ وفاقی حکومت کئی غیر ضروری ادارے ختم کرنا چاہتی ہے۔

ان کے مطابق 18ویں آئینی ترمیم کے بعد کئی امور صوبوں کو منتقل ہو گئے ہیں، اس لیے وفاق میں ان اداروں کی ضرورت نہیں رہی۔

انہوں نے کہا کہ حکومت کا بوجھ کم کرنے کے لیے سول سرونٹس ایکٹ 1973 میں ترمیم تجویز کی گئی ہے اور ایسے ملازمین کے لیے گولڈن شیک ہینڈ پیکیج بھی تیار کیا جا رہا ہے، تاکہ سرپلس پول میں بھیجے بغیر ان کی ملازمت سے علیحدگی کو ممکن بنایا جا سکے۔