بالی ووڈ اداکار عامر خان کے بھائی فیصل خان نے ایک حالیہ انٹرویو میں اپنی زندگی کے ایک تاریک پہلو کا انکشاف کیا ہے۔ انہوں نے الزام لگایا ہے کہ ایک وقت ایسا تھا جب ان کے خاندان نے انہیں ایک سال تک گھر میں قید رکھا تھا۔ فیصل کے مطابق، خاندان نے انہیں ذہنی بیماری (شیزوفرینیا) کا مریض قرار دیا تھا اور یہ سمجھا تھا کہ وہ معاشرے کے لیے خطرہ بن سکتے ہیں۔
فیصل نے اپنی حالت بیان کرتے ہوئے کہا کہ اس دوران انہیں گھر سے باہر جانے کی اجازت نہیں تھی، ان کا فون ضبط کر لیا گیا تھا، اور کمرے کے باہر گارڈز تعینات تھے جو انہیں دوائیں دیتے تھے۔ انہوں نے یہ بھی کہا کہ اس مشکل وقت میں وہ اپنے والد کی مدد کے منتظر تھے، لیکن ان سے رابطہ کرنا ممکن نہیں تھا۔
خاندان کا جواب
فیصل خان کے ان الزامات پر عامر خان کے خاندان نے شدید ردِ عمل ظاہر کرتے ہوئے ان تمام الزامات کی تردید کی ہے۔ ایک جاری بیان میں خاندان نے کہا ہے کہ فیصل کے یہ الزامات انتہائی افسوسناک ہیں اور یہ پہلی بار نہیں ہوا کہ انہوں نے واقعات کو غلط طریقے سے پیش کیا ہو۔
بیان میں واضح کیا گیا کہ فیصل سے متعلق تمام فیصلے خاندان نے ماہرِ نفسیات کی مشاورت کے بعد مل کر کیے تھے، اور یہ سب کچھ ان کی ذہنی اور جذباتی بہتری کے لیے کیا گیا تھا۔ خاندان نے ہمیشہ اس مشکل دور کی تفصیلات کو عوامی سطح پر لانے سے گریز کیا ہے۔
عامر خان کے خاندان نے میڈیا اور عوام سے درخواست کی ہے کہ اس انتہائی ذاتی معاملے کو سنسنی خیز انداز میں نہ اچھالا جائے اور غیر ضروری قیاس آرائیوں سے بچا جائے۔
