فلسطین و کشمیر کا حل عالمی امن کے لیے ضروری ہے، اقوام متحدہ اور او آئی سی کو عملی اقدامات کرنا ہوں گے: اسحاق ڈار

نائب وزیراعظم اسحاق ڈار نے نیویارک میں پاکستانی کمیونٹی سے خطاب کرتے ہوئے کہا ہے کہ اقوام متحدہ اور او آئی سی کو صرف بیانات تک محدود نہیں رہنا چاہیے، بلکہ فلسطین اور کشمیر جیسے دیرینہ تنازعات کے حل کے لیے عملی اقدامات کرنے ہوں گے۔

انہوں نے واضح کیا کہ فلسطینی عوام کے لیے دو ریاستی حل ہی واحد پائیدار راستہ ہے۔ اسحاق ڈار نے زور دیا کہ فوری جنگ بندی اور انسانی امداد کی بلاتعطل فراہمی کو یقینی بنانا ضروری ہے۔

ان کا کہنا تھا کہ او آئی سی دنیا کی دوسری بڑی تنظیم ہے اور اب اس کا کردار علامتی نہیں بلکہ فیصلہ کن ہونا چاہیے۔

کشمیر کے مسئلے پر بات کرتے ہوئے نائب وزیراعظم نے کہا کہ پاکستان بھارت سے امن چاہتا ہے اور اگر دعوت دی جائے تو مذاکرات کے لیے تیار ہے۔ ان کے مطابق مسئلہ کشمیر کا حل خطے میں ترقی، سیاحت اور سرمایہ کاری کے نئے دروازے کھول سکتا ہے۔

سلامتی کونسل میں منظور کی گئی متفقہ قرارداد 2788 کو انہوں نے پاکستان کی بڑی سفارتی کامیابی قرار دیا۔ ان کا کہنا تھا کہ اگر امریکہ ثالثی کرے تو پاکستان تیار ہے، لیکن بھارت کی رضامندی لازمی ہے۔ انہوں نے واضح کیا کہ پاکستان چین اور امریکہ دونوں سے متوازن تعلقات رکھتا ہے اور کسی بین الاقوامی بلاک کا حصہ نہیں بننا چاہتا۔

اسحاق ڈار نے مزید کہا کہ اگر امریکہ کشمیر پر عملی کردار ادا کرے تو اس دیرینہ تنازع کا حل ممکن ہے۔ انہوں نے بتایا کہ امریکی صدر ڈونلڈ ٹرمپ کا دورہ پاکستان خوش آئند ہوگا اور اس حوالے سے رسمی اعلان دونوں ممالک ایک ساتھ کریں گے۔

دہشت گردی کے خلاف پاکستان کے کردار پر روشنی ڈالتے ہوئے نائب وزیراعظم نے کہا کہ پاکستان نے لشکرِ طیبہ کو پہلے ہی ختم کر دیا ہے، جبکہ TRF کے خلاف امریکہ نے کوئی شواہد فراہم نہیں کیے۔ انہوں نے کہا کہ پاکستان دہشتگردی کا سب سے بڑا شکار رہا ہے، جس میں 80 ہزار سے زائد جانوں کا ضیاع اور 152 ارب ڈالر کا معاشی نقصان برداشت کیا گیا۔

ایران اور اسرائیل کے درمیان کشیدگی کے معاملے پر انہوں نے بتایا کہ پاکستان سفارتی سطح پر ثالثی کی کوششیں کر رہا ہے، اور جلد ایرانی صدر کا دورہ پاکستان متوقع ہے۔ دونوں ممالک کے وزرائے خارجہ مسلسل رابطے میں ہیں۔

انہوں نے عرب میڈیا سے بات کرتے ہوئے کہا کہ بھارت سے مذاکرات کے لیے پاکستان تیار ہے، تاہم بھارت کی جانب سے مسلسل منفی بیانات آ رہے ہیں۔ اسحاق ڈار نے کہا کہ پاکستان خطے کے تمام ممالک سے امن کا خواہاں ہے، اور جن ممالک نے اب تک فلسطین کو تسلیم نہیں کیا، انہیں آگے بڑھ کر واضح اقدام اٹھانا ہوگا۔