غزہ کے لیے پاکستان کی 17ویں امدادی کھیپ روانہ، اب تک 1,715 ٹن امداد بھیجی جا چکی
اسلام آباد انٹرنیشنل ایئرپورٹ سے غزہ کے لیے 100 ٹن امدادی سامان پر مشتمل 17ویں کھیپ خصوصی پرواز کے ذریعے روانہ کر دی گئی۔ امداد کی یہ کھیپ 65 ٹن تیار کھانے، 20 ٹن بچوں کے لیے خشک دودھ، 5 ٹن بسکٹ اور 10 ٹن ادویات پر مشتمل ہے۔
وفاقی حکومت نے غزہ کے لیے مجموعی طور پر 200 ٹن امدادی سامان دو خصوصی پروازوں کے ذریعے بھیجنے کا منصوبہ بنایا ہے، جس میں سے مزید 100 ٹن امداد آئندہ چند دنوں میں روانہ کی جائے گی۔
اب تک روانہ کی گئی 17 امدادی کھیپوں کا مجموعی وزن 1,715 ٹن ہو چکا ہے، اور اگلی پرواز کے بعد یہ تعداد 1,815 ٹن تک پہنچ جائے گی۔
اسلام آباد میں امدادی سامان کی روانگی کے موقع پر ایک خصوصی تقریب کا انعقاد کیا گیا، جس میں ڈپٹی وزیراعظم اسحاق ڈار اور چیئرمین این ڈی ایم اے لیفٹنینٹ جنرل انعام حیدر ملک نے بطور مہمان خصوصی شرکت کی۔ اس موقع پر وزارت خارجہ، این ڈی ایم اے اور الخدمت فاؤنڈیشن کے نمائندے بھی موجود تھے۔
ڈپٹی وزیراعظم نے امدادی سامان کی فوری روانگی یقینی بنانے پر متعلقہ اداروں کی کوششوں کو سراہا اور کہا کہ:
“پاکستان مشکل کی اس گھڑی میں فلسطینی عوام کے شانہ بشانہ کھڑا ہے اور ان کی ضروریات پوری کرنے کے لیے ہر ممکن اقدام کرے گا۔“
اس موقع پر پاکستان میں فلسطینی سفیر نے امداد فراہم کرنے پر پاکستانی حکومت اور عوام کا شکریہ ادا کیا۔
