امریکی صدر ڈونلڈ ٹرمپ نے صحافیوں سے گفتگو میں کہا کہ “مودی ہمیشہ میرے دوست رہیں گے، بھارت اور امریکا کا ایک خاص رشتہ ہے، گھبرانے کی ضرورت نہیں”۔
بھارتی وزیراعظم نریندر مودی نے صدر ٹرمپ کے بیان کا خیرمقدم کرتے ہوئے سوشل میڈیا پلیٹ فارم ’ایکس‘ پر کہا کہ وہ صدر کے جذبات اور مثبت تعلقات کے انداز کو سراہتے ہیں۔ انہوں نے مزید کہا کہ بھارت اور امریکا کے درمیان انتہائی مثبت اور مستقبل پر مبنی اسٹریٹجک شراکت داری ہے۔
واضح رہے کہ گزشتہ چند ماہ میں دونوں ممالک کے تعلقات میں کشیدگی دیکھی گئی۔ امریکا نے بھارتی درآمدات پر 50 فیصد ٹیرف عائد کی، اور ٹرمپ نے بھارت پر روس سے سستا تیل خریدنے کا الزام بھی لگایا۔ اس کے علاوہ، بھارت کے ساتھ تجارتی ڈیل فائنل نہ ہونے پر ٹرمپ نے بھارت کا دورہ منسوخ کر دیا تھا۔
ٹرمپ نے سوشل میڈیا پر مودی، پیوٹن اور شی جن پنگ کی تصویر شیئر کرتے ہوئے کہا تھا کہ “ایسا لگتا ہے بھارت اور روس چین کے قریب جا رہے ہیں”۔
دوسری جانب، مودی نے حال ہی میں چین کا دورہ کیا اور شنگھائی تعاون تنظیم (SCO) کے اجلاس میں شرکت کی، جو سات برس بعد ہوا اور اسے دونوں ممالک کے تعلقات میں نرمی کی کوشش کے طور پر دیکھا جا رہا ہے۔
