پاڪستان جي اسپيس اينڊ اپر اٽماسفيئر ريسرچ ڪميشن (سپارڪو) اعلان ڪيو آهي ته ملڪ جو جديد ريموٽ سينسنگ سيٽلائيٽ ڪاميابي سان خلا ۾ موڪليو ويو آهي ۽ هاڻي مڪمل طور تي آپريشنل آهي.
31 جولاءِ 2025 تي هي سيٽلائيٽ چين جي ژيچانگ سيٽلائيٽ لانچ سينٽر (XSLC) مان اڏاميو، ۽ لانچ کان پوءِ گرائونڊ اسٽيشنز سان رابطو قائم ڪندي هاءِ ريزولوشن تصويرون ڌرتي ڏانهن موڪلڻ شروع ڪري ڇڏيون آهن.
هن سيٽلائيٽ جي مدد سان شهري منصوبابندي، انفراسٽرڪچر جي ترقي ۽ علائقائي منصوبابندي ۾ انقلاب ايندو. اها ٽيڪنالاجي شهري پکيڙ تي نظر رکندي، قدرتي آفتن جهڙوڪ ٻوڏ، زلزلا ۽ لينڊ سلائيڊنگ بابت وقت سر ڊيٽا فراهم ڪندي، جنهن سان هنگامي حالتن ۾ تيز ردعمل ممڪن بڻبو.
سيٽلائيٽ ماحولياتي تحفظ ۾ به وڏو ڪردار ادا ڪندي. گليشيئرز جو پگھلڻ، جنگلات جي ڪٽائي ۽ ماحولياتي تبديلي جي رجحانن جي سڌي نگراني ڪري سگهبي. ان سان گڏوگڏ زرعي پيداوار کي وڌائڻ ۽ بهتر حڪمت عملي ٺاهڻ ۾ به مدد ملندي.
ترقياتي منصوبن ۾، خاص طور تي چائنا-پاڪستان اقتصادي رستي (CPEC) ۾ هي سيٽلائيٽ ٽرانسپورٽ نيٽ ورڪ جي نقشا سازي، جغرافيائي خطرن جي سڃاڻپ ۽ وسيلن جي مؤثر استعمال ۾ اهم ڪردار ادا ڪندو.
سپارڪو جي ترجمان موجب، هي ڪاميابي نه رڳو مختلف شعبن ۾ بهتر فيصلا سازي کي يقيني بڻائيندي، پر ملڪ جي ٽيڪنالاجيکي خودمختياري، پائيدار ترقي ۽ سماجي-اقتصادي استحڪام کي به نئون اوج ڏيندي.
هي لانچ پاڪستان جي خلائي سائنس ۾ هڪ نئون باب کوليو آهي ــ جيڪو مستقبل ۾ وڌيڪ خود انحصاري ۽ عالمي سطح تي سڃاڻپ جو ضامن بڻجي سگهي ٿو. 🚀🇵🇰
