کراچی: صوبائی وزیر اطلاعات شرجیل انعام میمن نے کہا ہے کہ سندھ اور پنجاب کے دریاؤں اور بیراجوں میں سیلابی پانی کے بہاؤ میں کمی بیشی کا سلسلہ جاری ہے، جبکہ حکومت سندھ صورتحال پر مسلسل نظر رکھے ہوئے ہے۔ تمام متعلقہ اداروں کو مکمل الرٹ رکھا گیا ہے تاکہ کسی بھی ہنگامی صورتحال سے فوری طور پر نمٹا جا سکے۔
بیراجوں پر موجودہ صورتحال
شرجیل میمن کے مطابق:
پنجند بیراج: ان فلو اور آؤٹ فلو 310,479 کیوسک
گڈو بیراج: ان فلو 359,570 کیوسک، آؤٹ فلو 327,481 کیوسک
سکھر بیراج: ان فلو 331,155 کیوسک (کمی ریکارڈ کی گئی)، آؤٹ فلو 277,355 کیوسک
گڈو، سکھر، کوٹری اور مرالہ پر نچلے درجے کا سیلاب جاری ہے۔
متاثرین کی منتقلی اور امدادی اقدامات
وزیر اطلاعات نے بتایا کہ:
گزشتہ 24 گھنٹوں میں 14,430 افراد کو کچے کے علاقوں سے محفوظ مقامات پر منتقل کیا گیا۔
اب تک مجموعی طور پر 109,320 افراد محفوظ مقامات تک پہنچائے جا چکے ہیں۔
346,282 مویشی محفوظ مقامات پر منتقل کیے گئے جبکہ 754,527 مویشیوں کو ویکسین لگائی گئی ہے۔
متاثرین کے لیے 169 طبی کیمپ قائم ہیں، جہاں گزشتہ 24 گھنٹوں میں 6,890 افراد کو طبی امداد فراہم کی گئی جبکہ مجموعی طور پر 27,801 متاثرین مستفید ہو چکے ہیں۔
سیلابی خطرات برقرار
شرجیل انعام میمن نے کہا کہ پانی کے بہاؤ میں کمی بیشی کے باوجود سیلابی خطرات کو نظر انداز نہیں کیا جا سکتا، اسی لیے تمام حفاظتی اقدامات مکمل کیے گئے ہیں۔ انہوں نے مزید کہا کہ حکومت سندھ اور پنجاب کے درمیان مسلسل رابطہ قائم ہے تاکہ کسی بھی ہنگامی صورتحال کا مشترکہ طور پر مقابلہ کیا جا سکے۔
