سعودی عرب میں غیر ملکیوں کو جائیداد خریدنے کی اجازت دینے کا فیصلہ

سعودی گیزٹ کی رپورٹ کے مطابق سعودی حکومت نے سرمایہ کاری کے فروغ اور رئیل اسٹیٹ سیکٹر کو وسعت دینے کے لیے اہم قدم اٹھایا ہے۔

نئے قوانین جن کا اطلاق جنوری 2026 سے ہوگا، غیر ملکیوں کو مخصوص علاقوں میں جائیداد خریدنے کی اجازت دیں گے۔

اس سے پہلے سعودی عرب میں غیر ملکی افراد کے لیے جائیداد خریدنا اور اس میں سرمایہ کاری کرنا ممنوع تھا۔

یہ قانون سعودی کابینہ کی منظوری کے بعد متعارف کرایا گیا ہے، تاہم مقدس شہروں مکہ مکرمہ اور مدینہ منورہ میں جائیداد کی ملکیت سخت شرائط اور ضوابط کے تحت ہی ممکن ہوگی۔

رئیل اسٹیٹ جنرل اتھارٹی کو یہ اختیار ہوگا کہ وہ ان مخصوص علاقوں کی نشاندہی کرے جہاں غیر ملکی سرمایہ کار جائیداد خرید سکیں گے۔

نیا قانون سعودی عرب کے پریمیئم ریزیڈنسی قانون اور خلیجی ممالک کے شہریوں کے جائیداد کے حقوق سے متعلق موجودہ ضوابط کے مطابق تیار کیا گیا ہے۔

واضح رہے کہ یہ اقدام وژن 2030 کے تحت ہونے والی وسیع معاشی اصلاحات کا حصہ ہے، جس کا مقصد سعودی معیشت کو تیل پر انحصار سے نکال کر عالمی سرمایہ کاری کا مرکز بنانا ہے۔