سدھو موسے والا کے مداحوں کیلئے سرپرائز: “سائنڈ ٹو گاڈ” عالمی ٹور کا اعلان، جدید ہولوگرام ٹیکنالوجی کے ساتھ واپسی

28 سالہ پنجابی گلوکار سدھو موسے والا کی 2022 میں المناک موت نے صرف بھارتی موسیقی نہیں، بلکہ عالمی انٹرٹینمنٹ انڈسٹری کو بھی ہلا کر رکھ دیا تھا۔ ان کے جانے کے بعد ایک ایسا خلا پیدا ہوا جسے مداح آج بھی شدت سے محسوس کرتے ہیں۔ لیکن حال ہی میں ان کے آفیشل سوشل میڈیا اکاؤنٹس سے کی گئی ایک غیر متوقع پوسٹ نے سب کو حیرت زدہ کر دیا ہے۔

پوسٹ میں سدھو موسے والا کے “عالمی ٹور” کا اعلان کیا گیا ہے، جسے “Signed to God” کا نام دیا گیا ہے۔ دلچسپ بات یہ ہے کہ یہ کوئی روایتی کنسرٹ سیریز نہیں، بلکہ ایک جدید ہولوگرام ٹیکنالوجی کے ذریعے پیش کیا جانے والا انوکھا ٹور ہوگا۔

اس پوسٹ کے ساتھ ایک ویب سائٹ لنک بھی شیئر کیا گیا ہے جس میں بتایا گیا ہے کہ یہ پراجیکٹ صرف موسیقی کا مظاہرہ نہیں بلکہ ایک جذباتی خراجِ تحسین ہے۔ اس ٹور میں 3D ہولوگرافک پروجیکشنز، سدھو موسے والا کی اصل آوازیں، سینیمیٹک ویژولز اور خصوصی اسٹیج ایفیکٹس شامل ہوں گے۔

یہ عالمی ٹور دنیا کے مختلف شہروں میں ہوگا، جن میں پنجاب، ٹورنٹو، لندن اور لاس اینجلس شامل ہیں۔ اس کا مقصد سدھو موسے والا کی یادوں کو تازہ رکھنا اور ان کے پیغام کو دنیا بھر میں مزید آگے بڑھانا ہے۔

مداحوں نے سوشل میڈیا پر اس خبر پر زبردست جوش و خروش کا اظہار کیا ہے، اور سبھی اس منفرد میوزک ٹور کا بے صبری سے انتظار کر رہے ہیں۔ بہت سے لوگ اسے “میوزک اور ٹیکنالوجی کا تاریخی سنگم” قرار دے رہے ہیں۔