رجب بٹ پر فائرنگ کا معاملہ؛ یوٹیوبر نے کاشف چوہان اور شہزاد بھٹی پر الزام دھر دیا، پولیس نے تردید کر دی

لاہور — معروف یوٹیوبر رجب بٹ نے الزام عائد کیا ہے کہ ان کے گھر پر فائرنگ کاشف چوہان نامی شخص نے کی، جس کا تعلق مبینہ طور پر “333 گروپ” سے ہے۔ ایک ویڈیو پیغام میں رجب بٹ کا کہنا تھا کہ فائرنگ کا واقعہ ایک منصوبہ بندی کے تحت پیش آیا، جس میں ملزم نے پہلے گاڑی تبدیل کی اور پھر موٹر سائیکل پر آ کر فائرنگ کی۔

رجب بٹ نے مزید دعویٰ کیا کہ اس حملے کے پیچھے بیرونِ ملک بیٹھا شہزاد بھٹی ہے، جس نے فائرنگ کروانے میں مرکزی کردار ادا کیا۔ ان کا کہنا تھا کہ “پولیس سب جانتی ہے، لیکن خاموش تماشائی بنی بیٹھی ہے۔”

پولیس نے الزامات مسترد کر دیے

دوسری جانب پولیس نے رجب بٹ کے تمام تر الزامات کو بے بنیاد قرار دیتے ہوئے مسترد کر دیا ہے۔ پولیس ترجمان کا کہنا ہے کہ فائرنگ کے واقعے کی تحقیقات جاری ہیں، تاہم تاحال کسی ملزم کی شناخت یا گرفتاری عمل میں نہیں آئی۔

ترجمان کے مطابق، “رجب بٹ نے ویڈیو میں جن ناموں کا ذکر کیا ہے، ان کی بابت پولیس کو کوئی علم نہیں۔ واقعے کی شفاف تفتیش جاری ہے اور جلد اصل ملزمان کو پکڑ لیا جائے گا۔”

سوشل میڈیا پر ردعمل

رجب بٹ کے ویڈیو پیغام نے سوشل میڈیا پر نئی بحث چھیڑ دی ہے۔ ان کے حامیوں نے واقعے کی شفاف تحقیقات اور ملوث افراد کی فوری گرفتاری کا مطالبہ کیا ہے، جبکہ بعض افراد نے یوٹیوبر کے دعووں پر سوالات بھی اٹھائے ہیں۔