دلجیت دوسانجھ اور ہانیہ عامر کی “سردار جی 3” نے پاکستان میں باکس آفس کا ریکارڈ توڑ دیا

معروف بھارتی گلوکار و اداکار دلجیت دوسانجھ اور پاکستان کی دلکش اداکارہ ہانیہ عامر کی نئی پنجابی فلم سردار جی 3 نے پاکستان میں ریلیز کے بعد شاندار کامیابی حاصل کر لی ہے، اور باکس آفس پر نئے ریکارڈ قائم کر دیے ہیں۔

اگرچہ فلم کو بھارت میں سینسر پابندیوں کا سامنا رہا، لیکن بین الاقوامی سطح پر خاص طور پر پاکستان میں اس کی مقبولیت نے سب کو حیران کر دیا۔

دلچسپ بات یہ ہے کہ پاکستان میں پنجابی فلموں کی نمائش اب بھی ممکن ہے، کیونکہ بیشتر فلم ساز برطانیہ یا کینیڈا سے قانونی طور پر وابستہ ہوتے ہیں، اور ان کی فلموں پر پاکستان میں براہِ راست پابندی لاگو نہیں ہوتی۔ یہی قانونی پہلو سردار جی 3 کی پاکستانی سینماؤں تک رسائی کی وجہ بنا۔

فلم نے ریلیز کے پہلے ہی ہفتے میں 21 کروڑ پاکستانی روپے (تقریباً 6.34 کروڑ بھارتی روپے) کا شاندار بزنس کیا۔ اس کے بعد دوسرے ہفتے میں 9.50 کروڑ روپے (تقریباً 2.86 کروڑ بھارتی روپے) کا مزید اضافہ ہوا، جبکہ تیسرے ہفتے کے صرف ایک دن میں فلم نے 10 کروڑ روپے (تقریباً 3.02 کروڑ بھارتی روپے) کی کمائی کی۔

تین ہفتوں میں مجموعی طور پر فلم نے 40.51 کروڑ پاکستانی روپے (یعنی 12.23 کروڑ بھارتی روپے) کا بزنس کر کے نہ صرف کامیڈی اور پنجابی فلموں کی کیٹیگری میں بلکہ بھارتی فلموں کے حوالے سے بھی پاکستان میں نئی تاریخ رقم کر دی ہے۔

اس شان دار کارکردگی کے ساتھ سردار جی 3 نے گزشتہ بلاک بسٹر فلم کیری آن جٹہ 3 کو بھی کمائی کے میدان میں پیچھے چھوڑ دیا ہے، جو اس سے پہلے پاکستان میں سب سے زیادہ بزنس کرنے والی بھارتی فلم تھی۔

فلمی تجزیہ کاروں کا کہنا ہے کہ اگر یہی رفتار برقرار رہی تو فلم کا بزنس اگلے چند ہفتوں میں 60 کروڑ پاکستانی روپے تک پہنچ سکتا ہے، جو کسی بھی غیر ملکی پنجابی فلم کے لیے ایک غیر معمولی سنگ میل ہوگا۔