خیبرپختونخوا پولیس کی جرات مندانہ کارروائی، وزیر داخلہ کا خراجِ تحسین
اسلام آباد: وزیر داخلہ محسن نقوی نے خیبرپختونخوا پولیس کو دہشتگردوں کے خلاف حالیہ کامیاب کارروائی پر خراجِ تحسین پیش کرتے ہوئے کہا ہے کہ پولیس نے پیشہ ورانہ صلاحیتوں اور جوانمردی کا مظاہرہ کرتے ہوئے دشمن کے ناپاک عزائم کو خاک میں ملا دیا۔
اپنے بیان میں وزیر داخلہ نے کہا کہ خیبرپختونخوا پولیس نے جس بہادری سے بھارت کی سرپرستی میں سرگرم دہشتگردوں کا مقابلہ کیا، وہ قابلِ فخر اور لائقِ تحسین ہے۔ ان کا کہنا تھا کہ حملہ آوروں کو منہ توڑ جواب دے کر پولیس نے نہ صرف تھانے کو بچایا بلکہ ایک بڑے سانحے کو بھی ٹال دیا۔
محسن نقوی کا کہنا تھا کہ خیبرپختونخوا پولیس کے جوان ماضی میں بھی ملک دشمن عناصر کے حملوں کو پسپا کرتے رہے ہیں، اور حالیہ کارروائی اس تسلسل کی ایک روشن مثال ہے۔
وزیر داخلہ نے پولیس ٹیم کو مبارکباد دیتے ہوئے کہا کہ پوری قوم کو اپنے ان سپاہیوں پر فخر ہے۔ ان کا مزید کہنا تھا کہ دشمن کو ہر محاذ پر شکست کا سامنا کرنا پڑے گا اور ریاست کی رِٹ کو چیلنج کرنے والوں کے خلاف سخت کارروائی جاری رکھی جائے گی۔
