محکمہ سیاحت خیبرپختونخوا کے مطابق، ہندوکش پہاڑی سلسلے کی 7 ہزار 708 میٹر بلند ترین چوٹی ترچ میر پر پاکستانی کوہ پیماؤں نے قومی پرچم لہرا دیا۔
یہ اعزاز گلگت بلتستان کے کوہ پیما سرباز خان اور عابد بیگ نے حاصل کیا، جبکہ ٹیم کے دیگر پانچ اراکین خراب موسم کے باعث 7 ہزار 300 میٹر تک پہنچ سکے۔
کوہ پیمائی ٹیم میں ڈائریکٹر ٹورازم اتھارٹی عمر خان، ڈاکٹر نوید اقبال، میجر محمد عاطف، شمس القمر اور اکمل نوید شامل تھے۔
ڈائریکٹر ٹورازم اتھارٹی نے کہا کہ خیبرپختونخوا حکومت نے پہلی مرتبہ سرکاری سطح پر ترچ میر چوٹی سر کرنے کے لئے اقدام اٹھایا ہے۔
وزیراعلیٰ خیبرپختونخوا علی امین گنڈا پور نے کامیاب کوہ پیماؤں کو مبارکباد پیش کی اور حکومت نے کوہ پیماؤں کے لئے دو سال کی رائلٹی فیس معاف کرنے کا اعلان کیا۔
