بن قاسم میں رینجرز اور پولیس کا مشترکہ آپریشن، علیحدگی پسند جماعت کے دو شرپسند گرفتار
تفصیلات کے مطابق سندھ رینجرز اور سندھ پولیس نے خفیہ معلومات کی بنیاد پر تھانہ بن قاسم کے علاقے میں ایک مشترکہ آپریشن کیا۔
یہ کارروائی علیحدگی پسند کالعدم جماعت سے تعلق رکھنے والے شرپسند عطاء اللہ شر کی موجودگی کی اطلاع پر عمل میں لائی گئی۔
آپریشن کے دوران قانون نافذ کرنے والے اداروں نے اسی جماعت سے تعلق رکھنے والے دو اہم ملزمان، زاہد علی مگسی اور عبدالغفور کو گرفتار کر لیا۔
ترجمان کے مطابق، گرفتار ملزمان کے قبضے سے ایک موبائل فون بھی برآمد کیا گیا ہے، جس سے ممکنہ طور پر مزید شواہد حاصل ہونے کی توقع ہے۔
ابتدائی تفتیش میں انکشاف ہوا ہے کہ یہ دونوں افراد 27 اپریل اور 22 جون 2025 کو احتجاج کے دوران سرکاری املاک اور گاڑیوں کو نقصان پہنچانے میں ملوث رہے ہیں۔
خصوصاً یہ دونوں ملزمان کاٹھور لنک روڈ پر پولیس کی ایک گاڑی کو آگ لگانے کے واقعے میں براہِ راست ملوث پائے گئے ہیں۔
ترجمان کا مزید کہنا تھا کہ ان شرپسند عناصر کے چھ مزید ساتھی اس سے قبل ہی قانون نافذ کرنے والے اداروں کے ہاتھوں گرفتار کیے جا چکے ہیں۔
گرفتار ملزمان کو ان کے قبضے سے برآمد شدہ سامان سمیت مزید قانونی کارروائی کے لیے پولیس کے حوالے کر دیا گیا ہے۔
