بلوچستان میں بھارتی اسپانسرڈ دہشت گردی کے خلاف کارروائیاں تیز، فتنہ الہندوستان کا انجام عبرتناک ہوگا: محسن نقوی

کوئٹہ میں وفاقی وزیر داخلہ محسن نقوی اور وزیراعلیٰ بلوچستان میر سرفراز بگٹی کے درمیان اہم ملاقات ہوئی، جس میں صوبے میں امن و امان اور “فتنہ الہندوستان” کے دہشت گرد عناصر کے خلاف جاری اقدامات پر تفصیلی تبادلہ خیال کیا گیا۔

دونوں رہنماؤں نے شہداء کو خراج عقیدت پیش کرتے ہوئے ان کے لیے دعا بھی کی۔ ملاقات کے بعد ایک خصوصی اجلاس کا انعقاد ہوا جس کی صدارت وزیر داخلہ اور وزیراعلیٰ نے مشترکہ طور پر کی۔ اجلاس میں امن و امان کی صورتحال، انسدادِ دہشت گردی کے آپریشنز اور بھارت کی پشت پناہی سے سرگرم دہشت گردوں کے خلاف کارروائیوں کا جائزہ لیا گیا۔

اجلاس میں انسپکٹر جنرل پولیس، آئی جی ایف سی نارتھ، ڈی آئی جی سی ٹی ڈی، ڈی آئی جی اسپیشل برانچ، ڈی جی لیویز، محکمہ داخلہ اور دیگر قانون نافذ کرنے والے اداروں کے اعلیٰ افسران شریک ہوئے۔

وزیراعلیٰ سرفراز بگٹی نے اجلاس کو سیکیورٹی اقدامات اور صوبائی ایکشن پلان پر عمل درآمد سے متعلق بریفنگ دی۔ اجلاس میں ان رکاوٹوں کا بھی جائزہ لیا گیا جو مؤثر آپریشنز کی راہ میں حائل ہیں۔

وفاقی وزیر داخلہ محسن نقوی نے واضح موقف اختیار کرتے ہوئے کہا:
“فتنہ الہندوستان کے دہشت گرد عبرتناک انجام کو پہنچیں گے، ریاستی رٹ چیلنج کرنے والوں کے ساتھ آہنی ہاتھوں سے نمٹا جائے گا۔ بلوچستان حکومت کو ہر سطح پر مکمل سپورٹ فراہم کی جائے گی۔”

وزیراعلیٰ سرفراز بگٹی نے کہا کہ:
“یہ جنگ صرف سیکیورٹی فورسز کی نہیں، پوری قوم کی ہے۔ بلوچستان میں ریاستی ادارے مکمل ہم آہنگی سے امن کے قیام کے لیے سرگرم ہیں۔ عوام اور فورسز کی قربانیاں رائیگاں نہیں جائیں گی۔ ہر قیمت پر امن قائم کریں گے۔”