بارشوں اور سیلاب سے نقصانات: وزیراعظم اور صدر مملکت کا اظہار افسوس، امدادی اقدامات تیز کرنے کی ہدایت
وزیراعظم شہباز شریف اور صدر مملکت آصف علی زرداری نے ملک کے مختلف حصوں میں حالیہ بارشوں اور سیلابی صورتحال سے ہونے والے جانی و مالی نقصانات پر گہرے رنج و غم کا اظہار کیا ہے۔
وزیراعظم شہباز شریف نے سیلاب اور حادثات میں جاں بحق ہونے والوں کے لیے بلند درجات کی دعا کی اور ان کے اہل خانہ سے دلی تعزیت کا اظہار کیا۔ انہوں نے متعلقہ حکام کو ہدایت دی کہ زخمیوں کو فوری طبی امداد فراہم کی جائے اور متاثرہ علاقوں میں ریسکیو آپریشنز مزید تیز کیے جائیں۔
وزیراعظم نے این ڈی ایم اے کو صوبائی حکومتوں اور اداروں سے قریبی رابطے میں رہنے اور متاثرہ عوام تک ہر ممکن ریلیف پہنچانے کی ہدایت کی۔ انہوں نے یہ بھی کہا کہ:
“آنے والے دنوں میں کسی بھی ممکنہ صورتحال سے نمٹنے کے لیے مکمل تیاری رکھی جائے۔”
وزیراعظم نے نیشنل ہائی وے اتھارٹی اور ایف ڈبلیو او کو ہدایت دی کہ سیلاب سے متاثرہ شاہراہوں اور رابطہ سڑکوں کی بحالی کا کام فوری اور مؤثر انداز میں مکمل کیا جائے۔
دوسری جانب، صدر مملکت آصف علی زرداری نے بھی قیمتی جانوں کے ضیاع پر گہرے رنج و افسوس کا اظہار کرتے ہوئے متاثرہ خاندانوں سے ہمدردی اور مرحومین کے لیے دعائے مغفرت کی۔
صدر مملکت نے متعلقہ اداروں کو تاکید کی کہ وہ متاثرہ علاقوں میں امدادی کارروائیاں تیز کریں اور متاثرین کو ہر ممکن امداد و بحالی کی سہولیات فراہم کی جائیں۔
