ایشیا کپ 2025 کے آغاز سے قبل ٹرافی کی شاندار رونمائی کی گئی جس کے بعد آٹھوں ٹیموں کے کپتانوں نے مشترکہ پریس کانفرنس میں شرکت کی اور ایونٹ جیتنے کے عزم کا اظہار کیا۔
سلمان علی آغا (پاکستان کرکٹ ٹیم کپتان)
قومی کپتان سلمان علی آغا نے کہا کہ ٹیم گزشتہ چار ماہ سے شاندار کارکردگی دکھا رہی ہے اور تمام کھلاڑی پرجوش ہیں۔
بھارت کے خلاف میچ پر بات کرتے ہوئے انہوں نے کہا:
“فاسٹ بولر کی خاصیت جارحانہ انداز ہے، اور ہم اسی انداز میں کھیلیں گے۔”
ان کا کہنا تھا کہ ٹی ٹوئنٹی فارمیٹ میں کوئی ٹیم فیورٹ نہیں کیونکہ چند اوورز میں ہی میچ کا رخ بدل سکتا ہے۔
سوریا کمار یادیو (بھارت کرکٹ ٹیم کپتان)
بھارتی کپتان سوریا کمار یادیو نے کہا کہ ٹیم طویل عرصے بعد ٹی ٹوئنٹی کھیل رہی ہے، لیکن وہ اس چیلنج کو قبول کرنے کے لیے تیار ہیں۔
انہوں نے کہا کہ یو اے ای میں کنڈیشنز بہتر ہیں اور ہر ٹیم سخت مقابلہ کرے گی۔
“ٹی ٹوئنٹی فارمیٹ میں کوئی ٹیم کمزور نہیں، ہر ٹیم حیران کن کارکردگی دکھا سکتی ہے۔”
راشد خان (افغانستان کرکٹ ٹیم کپتان)
راشد خان نے کہا کہ افغانستان ایونٹ جیتنے کے لیے 100 فیصد محنت کرے گا۔
انہوں نے ویسٹ انڈیز ورلڈکپ سیمی فائنل کا حوالہ دیتے ہوئے کہا کہ سخت محنت کے باعث کامیابی ملی اور اسی جذبے سے کھیلیں گے۔
لٹن داس (بنگلہ دیش کرکٹ ٹیم کپتان)
لٹن داس نے کہا کہ ہر میچ جیتنے کے لیے پوری محنت اور حکمت عملی کی ضرورت ہے۔
انہوں نے بتایا کہ بنگلادیشی ٹیم نے آخری تین سیریز میں اچھی کارکردگی کا مظاہرہ کیا ہے۔
یاسم مرتضیٰ (ہانگ کانگ کرکٹ ٹیم کپتان)
یاسم مرتضیٰ کا کہنا تھا کہ ٹیم نے یہاں تک پہنچنے کے لیے بہت محنت کی ہے اور شائقین کو بہترین کرکٹ دیکھنے کو ملے گی۔
جتندر سنگھ (عمان کرکٹ ٹیم کپتان)
جتندر سنگھ نے کہا کہ عمان پہلی بار ایشیا کپ کھیل رہی ہے لیکن ماضی کے تین ورلڈکپ کا تجربہ کارکردگی بہتر بنانے میں مدد دے گا۔
محمد وسیم (یو اے ای کرکٹ ٹیم کپتان)
محمد وسیم کا کہنا تھا کہ ٹیم نے ایونٹ کے لیے چار ماہ سے بھرپور تیاری کی ہے اور وہ پراعتماد ہیں کہ یو اے ای کی ٹیم یہ چیلنج قبول کرے گی۔
چارتھ اسالنکا (سری لنکا کرکٹ ٹیم کپتان)
چارتھ اسالنکا نے مسکراتے ہوئے کہا کہ:
“زمبابوے کے خلاف میچز کے بعد سیدھا یہاں آئے ہیں، امید ہے کوچ ہمیں تھوڑا آرام دیں گے۔”
انہوں نے کہا کہ شدید گرمی میں فریش رہ کر بہترین کھیل پیش کرنا ہوگا۔
