ایس آر او 760 کی معطلی کے باعث پاکستان کی سونے کے زیورات کی برآمدات مکمل طور پر ٹھپ ہوگئیں، جس سے ملکی ایکسپورٹرز بدترین بحران کا شکار ہیں۔ صورتحال یہ ہے کہ مارچ 2025 سے اب تک ایک گرام زیورات بھی برآمد نہیں ہوسکا، جس کے نتیجے میں پاکستان کو 15 ملین ڈالر کا نقصان برداشت کرنا پڑا۔
پاکستان جیمز جیولری ٹریڈرز اینڈ ایکسپورٹرز ایسوسی ایشن کے مطابق مجموعی طور پر 6 ملین ڈالر مالیت کا 50 کلو ایڈوانس گولڈ ملک میں پھنسا ہوا ہے، جو غیر ملکی خریداروں نے زیورات کی تیاری کے لیے فراہم کیا تھا۔
متحدہ عرب امارات سمیت غیر ملکی خریداروں نے پاکستانی ایکسپورٹرز کو نوٹس بھیج دیے ہیں، جن میں ایڈوانس گولڈ کی واپسی اور واجبات روکنے کی شرط عائد کی گئی ہے۔ حتیٰ کہ خریداروں نے پاکستانی سفارتخانے کو بھی مکتوب ارسال کرکے اپنے خدشات کا اظہار کیا ہے۔
ایسوسی ایشن نے خبردار کیا ہے کہ اگر فوری طور پر برآمدات بحال نہ کی گئیں تو پاکستان کی عالمی ساکھ کو شدید نقصان پہنچے گا اور وہ مارکیٹ، جو 50 سال کی محنت سے حاصل کی گئی تھی، بھارت کے ہاتھوں میں منتقل ہوجائے گی۔
سابق چیئرمین حبیب الرحمن کے مطابق صرف 8 بڑے ایکسپورٹرز کے پاس 60 ملین ڈالر کے آرڈرز موجود تھے، جو سخت مقابلے کے بعد بھارت سے حاصل کیے گئے تھے۔ تاہم 6 مئی کو ایس آر او 760 کی معطلی کے بعد یہ آرڈرز تعطل کا شکار ہوگئے ہیں اور غیر ملکی خریدار قانونی چارہ جوئی پر غور کر رہے ہیں۔
ایکسپورٹرز نے بتایا کہ وہ اس معاملے پر متعلقہ وزارتوں اور اعلیٰ حکام سے بارہا ملاقات کرچکے ہیں اور ایکسپورٹ بحالی کی یقین دہانیاں بھی ملی ہیں، لیکن کئی ماہ گزرنے کے باوجود کوئی عملی قدم نہیں اٹھایا گیا۔
