ایران کے وزیر داخلہ سکندر مومنی نے پاکستان، خصوصاً خیبرپختونخوا اور گلگت میں طوفانی بارشوں اور سیلاب سے قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ انہوں نے جاں بحق افراد کے اہل خانہ سے دلی تعزیت کرتے ہوئے صبر جمیل کی دعا کی اور سیلاب متاثرین کی مدد کے لیے ہر ممکن تعاون کی پیشکش کی۔
ایرانی وزیر داخلہ کا کہنا تھا کہ “پاکستان ہمارا برادر ہمسایہ ملک ہے، آزمائش کی اس گھڑی میں ہم ہر طرح کی مدد کے لیے تیار ہیں۔ پاکستان میں سیلاب کی تباہ کاریاں دیکھ کر بہت افسوس ہوا ہے، جس میں سیکڑوں افراد اپنے پیاروں سے بچھڑ گئے ہیں۔ ہم پاکستانی عوام کے ساتھ شانہ بشانہ کھڑے ہیں۔”
وفاقی وزیر داخلہ محسن نقوی نے سیلاب متاثرین کے لیے مدد کی پیشکش اور اظہارِ یکجہتی پر اپنے ایرانی ہم منصب کا شکریہ ادا کیا۔ انہوں نے کہا کہ “ایران اور پاکستان کی خوشیاں اور غم سانجھے ہیں۔ موسمیاتی تبدیلیاں پاکستان میں ہولناک تباہی کا پیش خیمہ بن رہی ہیں اور تاریخ میں پہلی بار ملک کو اس خطرناک صورتحال کا سامنا ہے۔”
محسن نقوی نے مزید کہا کہ تمام ادارے سیلاب متاثرین کی مدد کے لیے فیلڈ میں موجود ہیں اور ان کی بحالی و ریلیف حکومت کی اولین ترجیح ہے۔
