اولمپک گولڈ میڈلسٹس کے لیے انعامی رقم میں غیر معمولی اضافہ، وزیراعظم کا بڑا اعلان

وزیراعظم نے کھلاڑیوں کی حوصلہ افزائی کے لیے انعامی رقوم میں نمایاں اضافہ کر دیا ہے۔ نئے فیصلے کے تحت اولمپک گیمز میں گولڈ میڈل جیتنے والے ایتھلیٹس کو اب تین کروڑ روپے انعام دیا جائے گا، جو اس سے قبل صرف ایک کروڑ روپے تھا۔

سلور میڈل حاصل کرنے والے ایتھلیٹس کو دو کروڑ جبکہ برونز میڈل جیتنے والوں کو ایک کروڑ روپے انعام دیا جائے گا۔

حکومتی فیصلے میں واضح کیا گیا ہے کہ ونٹر اولمپکس اور پیرا اولمپک گیمز کے گولڈ میڈلسٹس کے لیے بھی ایک کروڑ روپے انعام مقرر کیا گیا ہے۔ اسی طرح ایشین گیمز میں گولڈ میڈل پر ایک کروڑ، سلور پر 70 لاکھ اور برونز پر 50 لاکھ روپے دیے جائیں گے۔

کامن ویلتھ گیمز میں گولڈ میڈل جیتنے والے ایتھلیٹس کو 75 لاکھ، جبکہ اسلامک گیمز میں یہ انعامی رقم 50 لاکھ روپے مقرر کی گئی ہے۔

اس کے علاوہ برٹش جونیئر اور یو ایس اوپن جونیئر کے فاتحین کو بھی ایک کروڑ روپے انعام دیا جائے گا۔ ایشین انڈور گیمز کے گولڈ میڈلسٹس کو 20 لاکھ اور سیف گیمز کے گولڈ میڈل جیتنے والے کھلاڑی کو 10 لاکھ روپے دیے جائیں گے۔

یوتھ اولمپکس کے گولڈ میڈل جیتنے والوں کے لیے انعامی رقم 50 لاکھ، جبکہ ورلڈ چیمپئن شپ کے گولڈ میڈلسٹس کو 75 لاکھ روپے دیے جائیں گے۔

فیصلے میں خصوصی کھلاڑیوں کو بھی شامل کیا گیا ہے۔ اسپیشل اولمپک ورلڈ گیمز، بلائنڈ اور ڈیف اسپورٹس کے لیے بھی انعامی رقوم مختص کی گئی ہیں۔

وزیراعظم کے اس اعلان کو کھلاڑیوں اور کھیلوں سے وابستہ حلقوں کی جانب سے بھرپور پذیرائی حاصل ہو رہی ہے، جسے ملک میں کھیلوں کے فروغ کی جانب ایک مثبت قدم قرار دیا جا رہا ہے۔