سائنس کی دنیا میں ایک بڑا سنگِ میل عبور کیا گیا ہے۔ محققین نے پہلی بار خنزیر کے جینیاتی طور پر تبدیل کیے گئے پھیپھڑے ایک 39 سالہ مریض کو ٹرانسپلانٹ کیے، جو اسٹروک کے باعث وفات پا چکا تھا۔
ماہرین کے مطابق مریض کے مدافعتی نظام نے ان پھیپھڑوں کو فوری طور پر رد نہیں کیا، اور یہ پھیپھڑے نو دن تک فعال رہے۔ یہ تجربہ زینو ٹرانسپلانٹیشن کے شعبے میں ایک انقلابی قدم قرار دیا جا رہا ہے، کیونکہ انسانی جسم عام طور پر جانوروں کے اعضاء کو قبول نہیں کرتا۔
سائنس دانوں نے وضاحت کی کہ پھیپھڑوں کے ٹرانسپلانٹیشن میں سب سے بڑی رکاوٹ یہ ہے کہ وہ مسلسل ہوا اور مائیکروبس کے سامنے رہتے ہیں، جو مدافعتی نظام کو متحرک کرتے ہیں اور جسم عضو کو رد کر دیتا ہے۔ تاہم، اس بار جینیاتی تبدیلی نے یہ رکاوٹ ختم کر دی۔
محققین کے مطابق CRISPR/Cas9 ٹیکنالوجی کا استعمال کرتے ہوئے پھیپھڑوں کو اس انداز سے بدلا گیا کہ انسانی مدافعتی نظام نے انہیں “غیر ملکی” عضو نہ سمجھا۔ سائنس دانوں کا کہنا ہے کہ یہ کامیابی مستقبل میں ان لاکھوں مریضوں کے لیے امید کی کرن ہو سکتی ہے جو اعضا کے عطیہ نہ ملنے کے باعث زندگی کی جنگ لڑ رہے ہیں۔
