چینی وزارتِ خارجہ کے مطابق، وزیرِ خارجہ وانگ ای نے کہا ہے کہ پاکستانی فوج قومی استحکام کا ستون ہے اور پاک–چین دوستی و تعاون کی مضبوط محافظ ہے۔ انہوں نے اس بات پر زور دیا کہ پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد کی بھرپور حمایت کی ہے۔ دنیا میں بڑھتی غیر یقینی صورتحال کے باوجود پاک–چین تعلقات کا فروغ علاقائی امن و استحکام کے لیے نہایت اہم ہے۔
وانگ ای نے کہا کہ چین اپنی پڑوسی سفارت کاری میں ہمیشہ پاکستان کو اولین ترجیح دیتا رہا ہے، اور وقت کے کڑے امتحانات کے باوجود پاک–چین تعلقات مزید مستحکم ہوئے ہیں۔ انہوں نے یقین دہانی کرائی کہ چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا اور عالمی امور میں پاکستان کے بڑے کردار کا خیرمقدم کرتا ہے۔
چینی وزارتِ خارجہ کے مطابق، فیلڈ مارشل سید عاصم منیر نے اس موقع پر کہا کہ چین پاکستان کا “آہنی دوست” ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں۔ انہوں نے کہا کہ پاک–چین اسٹریٹجک شراکت داری چٹان کی طرح مضبوط ہے اور پاکستان میں چین کے ساتھ دوستانہ تعلقات قائم رکھنا پوری قوم کا متفقہ مؤقف ہے۔
فیلڈ مارشل نے پاکستان کی معاشی اور سماجی ترقی میں قیمتی تعاون پر چین کی قیادت سے اظہارِ تشکر کیا اور کہا کہ پاکستانی فوج انسداد دہشت گردی اور سیکیورٹی تعاون کو فعال طور پر فروغ دینے کے لیے تیار ہے۔
انہوں نے مزید کہا کہ پاکستان میں چینی اہلکاروں، منصوبوں اور اداروں کی حفاظت یقینی بنائی جائے گی اور پاک–چین دوستی کو مزید مستحکم بنانے کے لیے اقدامات جاری رہیں گے تاکہ ترقی کی راہ پر مل کر سفر جاری رکھا جا سکے۔
