میڈیا رپورٹس کے مطابق ترکی کے وزیر ٹرانسپورٹ عبدالقادر یورالوغلو نے اپنی ہی ایک ویڈیو سوشل میڈیا پر شیئر کردی جس میں وہ ہائی وے پر گاڑی کو 225 کلومیٹر فی گھنٹہ کی رفتار سے دوڑاتے دکھائی دیے۔
ویڈیو کو انہوں نے #TurkiyeAccelerates ہیش ٹیگ کے ساتھ اپ لوڈ کیا اور بتایا کہ مقصد انقرہ – نیغے موٹر وے کے حالات کی جانچ تھا۔
تاہم ٹریفک پولیس نے اس ویڈیو کو دیکھنے کے بعد انہیں 9,267 ترک لیرا کا جرمانہ عائد کیا۔ دلچسپ بات یہ ہے کہ یورالوغلو نے خود سوشل میڈیا پر جرمانے کی تصویر بھی پوسٹ کی اور اعتراف کیا کہ “میں نے اپنی ہی خلاف ورزی کو اجاگر کیا، اب آئندہ زیادہ احتیاط کروں گا۔”
اس واقعے کے بعد سوشل میڈیا پر شدید ردعمل سامنے آیا، صارفین نے طنز کرتے ہوئے کہا کہ ٹریفک قوانین پر عمل کرانے والے وزیر نے ہی قانون توڑا۔ ناقدین نے اسے ’’عملی تضاد‘‘ قرار دیا، جبکہ کچھ صارفین نے اسے وزیر کا ’’عجیب و غریب اعتراف‘‘ بھی کہا۔
